Hér hleður þú niður klassísku lausninni fyrir hunda.

Leiðbeiningar fyrir klassísku lausnina eru undir.

Með því að nota þessa lausn samþykkir þú eftirfarandi skilmála (sjá neðst á síðunni):

…

Notar þú CD diskspilara? Skoðaðu neðar á síðunni (smella).

Sýnilegi hluti flugelda: Sjá líka neðar á síðunni.

…

Ertu með nettengt tæki?

Þú getur streymt hljóðunum beint af streymisveitunni Sound Cloud (smella).

 

 

Leiðbeiningar fyrir klassísku lausnina

Byrja lágt, hækka smám saman

Vandinn við flugeldahljóð er m.a. að þau eru óþekkt, heyrast sjaldan, koma skyndilega og með miklum hávaða. Ef gæludýraeigandi spilar slík hljóð fyrir gæludýrið á fullum styrk, er gæludýrið í sömu stöðu og í “náttúrulegu” stöðunni, þ.e. hljóðin eru mjög hávær og gæludýrið getur fengið áfall og fyllst hræðslu.

Lausnin á því er að byrja að spila hljóðin mjög lágt og hækka svo smám saman, eins og gæludýrið þolir. Að lokum þekkir það hljóðið á fullum styrk og kippir sér ekki upp við það. Þessi aðferð kallast desensitization þegar unnið er með vandamál, eða habituation þegar verið er að fyrirbyggja vandamál. Hér eru skrefin. Kynntu þér vel þessi skref og farðu eftir þeim, þá er hámarks líkur á góðum árangri 🙂

1. Hljóðin á að spila daglega þar til hundurinn hefur vanist hljóðunum, og hræðist þá ekki hin raunverulegu hljóð, eða hræðist þau minna.* Lykil atriði sem verður að fylgja er að byrja á spilunina mjög lágt, og hækka svo hjóðhæðina í litlum skrefum eftir því sem hundurinn þolir, þar til þau hafa náð fullum styrk. Ekki freistast til að byrja á að spila hljóðin af fullum styrk í upphafi, “til að prófa, bara smá, til að sjá hvort hundurinn bregðist við”. Þetta getur leitt til áfalls fyrir dýrið. Hljómtæki sem eru notuð eiga, undir lok ferlisins, að skila hljóðunum sæmilega raunverulega í styrk og hljómgæðum. Fjórar mismunandi flugeldahljóðskrár fylgja þessari lausn og á að spila þær sitt á hvað fyrir fjölbreytni (lengd frá rúmum fimm til rúmlega átta mínútur), á mismunandi stöðum og jafnvel tímum.
2. Spilaðu hljóðin mjög lágt. Skoðaðu viðbrögðin:
3. Afslappaður: Ef hundurinn þinn er alveg afslappaður, hækkaðu hljóðið örlítið daginn eftir.
4. Örlítið órólegur: Ef hundurinn sýnir smá óróleika, þá ertu á góðum stað, alveg við mörkin að “pirrings” svæði hundsins. Haltu áfram nokkra daga þar til hundurinn er orðinn rólegur og hefur vanist hljóðunum. Hækkaðu svo hljóðið örlítið daginn eftir, og haltu þessu áfram koll af kolli.
5. Mjög órólegur: Ef hundurinn er mjög órólegur, hættu þá. Lækkaðu hljóðið daginn eftir og haltu áfram. Ef hundurinn róast alls ekki og er mjög æstur og þjáður, talaðu þá við dýralækni. Það geta verið önnur heilsufarsleg vandamál fyrir hendi, sem þessi meðferð lagar ekki.
6. Þegar þú hefur hækkað hljóðið aðeins, farðu þá eins að. Miðaðu við lið 2. 3. og 4. Svona hækkar þú hljóðstyrkinn smám saman, með eins eða fleiri daga millibili, þar til fullri hljóðhæð er náð, eins og verið sé að sprengja skotelda úti, nærri staðnum. Gerðu þetta eins hratt og mögulegt er, ekki dvelja við óbreytta hljóðhæð. Það er misjafnt hve langan tíma þetta tekur milli hunda. Frá einni viku til nokkurra vikna. Ef þú átt fleiri en einn, þarftu að miða framganginn við þann sem tekur hægast við sér og er viðkvæmastur.
7. Þú þarft að muna hvaða hljóðhæð var stillt á síðast, svo þú getir haldið áfram á sama styrk eða örlítið hærri. Ef allt í einu er spilað á of miklum styrk getur hundurinn fengið áfall og hellst yfir hann hræðslan sem einmitt er verið að reyna að vinna með eða fyrirbyggja, sem getur tekið talsverðan tíma að laga. Það er nauðsynlegt að spila hljóðin á öllum stöðum þar sem hundurinn ver tíma, inni í húsi, út, í bílnum, eða alla vega öllum stöðum þar sem búast má við að hann heyri flugeldarhljóð. Annars getur hann vanist hljóðum á einum stað, en verið jafn hræddur við þau á öðrum stað, (e. locational tolerance). Hundurinn má ekki átta sig á að þú setjir hljóðin af stað. Þau eiga að koma “fyrir tilviljun”. Ekki rjúfa hljóðin skyndilega, og alls ekki þannig að hundurinn átti sig að þú sért að því. Passaðu upp á að önnur áreiti séu ekki í gangi sem trufla. Láttu alla vita hvað er að gerast, svo allir séu sáttir. Svona hljóð eru ekki alltaf skemmtileg, en þetta eru bara 5-9 mínútur í einu.
8. Til að fylgjast með hundinum er gott að skilja vel hræðslumerki. Smelltu hér til að sjá lista yfir hræðslumerki hunda. Sýndu sjálf/ur engin viðbrögð, eins og hljóðin skipti alls engu máli, og ekki bregðast við með vorkunn eða hughreystandi viðbrögðum ef hundurinn er órólegur. Með því sýnir þú að hljóðin skipta engu máli, enda eru hljóðin ekki hættuleg, og hundurinn áttar sig á því að lokum. Ef þú kjassar hundinn og talar í vorkunnartón þegar hann sýnir óöryggi heldur hann að það sé raunveruleg ástæða til að vera hræddur. Sumir hundaeigendur hafa spanað upp enn meiri  hræðslu í hundinum sínum með slíku. Í staðinn áttu að lækka hljóðið og halda svo áfram frá þeim punkti. Þú átt alls ekki að skamma hundinn ef hann sýnir hræðslumerki. Það gerir illt verra. Það er í lagi að hann hafi t.d. bein að naga, eða að leika aðeins við hann á meðan hljóðin hljóma. Þá er stundin afslöppuð.
9. Þegar þú spilar hljóðin á hljóðstyrk sem er eins og raunverulega sé verið að skjóta upp flugeldum, og hundurinn er orðinn vanur og rólegur yfir hljóðunum, enda hefur þol hans verið byggt upp “mjúklega”, stig af stigi, má telja að hundurinn sé útskrifaður! Til hamingju!
10. Þó er ekki hægt að tryggja að hundurinn sé alveg sáttur þegar raunverulegum flugeldum, skotkökum og slíku er skotið upp. Heyrn hunda er næmari en okkar, og hávaðasamir hvellir geta verið mjög óþægilegir, plús lykt af brennandi púðri, og svo sýnilegi hluti flugeldanna (sjá undir). Ef þú ert ekki örugg/ur um að búið sé að venja hundinn á hljóðin, hundurinn er órólegur, hafðu hann þá inni yfir áramótin og búðu um hann eins og mælt er með (sjá leiðbeiningar hér). Raunar skaltu hafa þessi ráð til reiðu, hvort sem þú telur hundinn tilbúinn eða ekki. Síðari tíma viðhald: Gæludýr geta “af-vanist” hljóðunum. Því er nauðsynlegt að viðhalda þessu með því að spila hljóðin aftur, til dæmis nokkrum vikum fyrir flugeldatíma.
11. Það segir ekkert um “gæði” hundsins hve langan tíma þetta tekur, sem er mjög mismunandi (og margir eru ekki viðkvæmir fyrir þessu yfirleitt). Þetta er eins og að vera nærsýnn eða fjarsýnn, þú dæmir ekki manneskjuna eftir því. Það er því þarflaust að bera saman hunda og láta eins og einn sé betri en hinn.

Notar þú CD diskspilara?

 

Ef þú vilt spila af CD disk, eru tvær leiðir:

1  Þú getur brennt eigin CD disk með klassísku lausninni, notandi MP3 skrárnar á þessari síðu og einn tóman CD-R disk.

2   Þú getur keypt CD disk á Amazon. Það er ekki mikið úrval en Victoria Stilwell er með fireworks disk. Athugaðu þó að 18,81 dollara diskur kostar hingað kominn um 5.200 krónur með sendingu, afgreiðslugjaldi og virðisaukaskatti.

Sýnilegi hluti flugeldanna. Geturðu þjálfað þann þátt?

Ef þú átt stórt (mjög stórt) sjónvarp eða skjávarpa til að varpa á vegg í myrku herbergi, eða utandyra í myrkri, geturðu spilað video, þar sem hann er tiltölulega nálægt. Þú ferð svipað að og með hljóðin, þ.e. lætur skjáinn vera nokkuð langt frá í upphafi, og færir gæludýrið svo nær (eða skjáinn nær), þar til lætin á skjánum eru orðin þokkalega stór hluti sjónsviðsins. Það er hugsanlegt að hundurinn læri á sjónræna þáttinn líka. Hundar hafa fullkomnari sjón en mennirnir: Videomynd með 25 römmum á sekúndu sjáum við sem samfellda flæðandi hreyfimynd, en hundurinn sér 25 sjálfstæðar myndir. Flugeldahljod.com hefur sérstakan áhuga á að heyra af árangri af svona tilraun.

Smelltu hér til að sjá myndskeið frá áramótum, á Youtube.

Smelltu hér til að sjá myndskeið frá flugeldasýningu, á Youtube.

Hljóðrásin er góð í þessu myndskeiði. Smelltu á ferninginn niðri til hægri við skjáinn á Youtube, þá færðu allan skjáinn (full screen). Þú getur hlaðið niður myndskeiðinu með til þess gerðri þjónustu, til dæmis þessari.

Lagaleg skilyrði (disclaimer) varðandi öryggi og árangur

Með því að hlaða niður og nota hljóðskrárnar og leiðbeiningarnar samþykkir þú þessi skilyrði, og staðfestir að þú hefur kynnt þér vel efni þessara vefsíðna og ferð vandlega eftir leiðbeiningunum. Flugeldahljod.com getur ekki ábyrgst árangur af þessari aðferð. Flugeldahljod.com geta aðeins lofað að hafa lagt mikla vinnu í að gera þessar lausnir og leiðbeiningar vel úr garði, og að ef að hópur gæludýraeigenda nota þessar aðferðir þá á ástandið á gæludýrunum, heilt yfir séð, að verða mun betra í þessu tilliti en annars hefði verið. Hér er boðið upp á sérstaklega samsettar hljóðskrár og leiðbeiningar, en þar fyrir utan eru fjórir megin þættir sem Flugeldahljod.com getur ekki haft áhrif á:

1. Gæludýr eru mismunandi að upplagi. Sum verða ekki hrædd við hljóð, önnur mjög hrædd. Sum ná frekar fljótt að venjast hljóðum, önnur taka lengri tíma, og örfá glíma við önnur heilsufarsleg, taugaleg, erfðafræðileg mál sem blandast í málið og gera að verkum að ekki er hægt að vinna með dýrið nema með aðkomu dýralæknis.
2. Aðstæður eru mismunandi, og hljómtæki sem fólk á eru mismunandi.
3. Eigendur eru mismunandi, með mismunandi nálgun að svona aðferð, og hafa mis mikinn tíma, en þessi aðferð krefst nokkurrar nákvæmni, sérstaklega klassíska aðferðin, en nýja aðferðin ætti að vera auðveldari og öruggari.
4. Stundum koma upp óvænt tilvik sem enginn gat séð fyrir, en hafa áhrif á framvinduna.

Flugeldahljod.com getur ekki haft nein áhrif á þessa þætti. Lausnin á Flugeldahljod.com er © copyright 2015 allur réttur áskilinn, og er aðeins til einkanota. Notandi verður að sækja lausnina hingað og taka þátt í spurningakönnun, og má ekki áframselja lausnina.